Christum ducem / Qui velatus

Christum ducem qui per crucem
Redemit nos ab hostibus,
Laudet coetus noster laetus,
Exultet coelum laudibus.

Poena fortis tuae mortis
Et sanguinis effusio
Corda terant ut te querant,
Jesu nostra redemptio.

Per felices cicatrices,
Sputa, flagella, verbera,
Nobis grata sint colata
Aeterna Christi munera.

Nostrum tangat cor ut plangat
Tuorum sanguis vulnerum,
In quo toti sumus laeti
Conditor alme siderum.

Passionis tuae donis,
Salvator, nos inebria :
Ac etiam dare velis
Beata nobis gaudia.

Qui velatus facie fuisti,
Et penurias sustinuisti,
Sol iustitiae,
Flexis illusus genibus,
Caesus quoque verberibus,
Te petimus attentius,
Esto nobis propitius,
Et per tuam clementiam
Perducas nos ad gloriam.

Hora qui ductus tertia
Fuisti ad supplicia,
Christe, ferendo humeris
Crucem pro nobis miseris,
Fac sic te nos diligere
Sanctamque vitam ducere
Ut valeamus requie
Frui coelestis patrie.

In flagellis potum fellis
Bibisti amarissimum ;
Omni genti recolenti
Tuae mortis supplicium,
Da virtutem et salutem,
Christe redemptor omnium.
Honor et benedictio
Sit crucifixo Filio
Qui suo supplicio
Nos redemit ab inferno.

In amara crucis ara
Fudisti rivos sanguinis,
Jesu Christe, rex benigne,
Consors paterni luminis;
Sanguis Christi qui fudisti
Peremptor hostis invidi,
Fac nos ire et venire
Ad coenam agni providi.

Qui iacuisti mortuus
In petra rex innocuus,
Fac nos in te quiescere
Semperque laudes reddere,
Succurre nobis, Domine,
Quos redemisti sanguine,
Et duc nos ad coelestia
Eterne pacis gaudia.