Las ! sans la voir à toute heure je voy
Ceste beauté dedans mon cœur presente :
Ny mont, ny bois, ny fleuve ne m'exente,
Que par pensée elle ne parle à moy.

Dame, qui sçais ma constance et ma foy,
Voy, s’il te plaist, que le temps qui s'absente,
Depuis sept ans en rien ne desaugmente
Le plaisant mal que j'endure pour toy.

De l'endurer lassé je ne suis pas,
Ny ne seroy-je, allassé-je là bas
Pour mille fois en mille corps renaistre.

Mais de mon cœur, sans plus je suis lassé,
Qui me desplaist et qui plus ne peut estre
Mien comme il fut, puis que tu l'as chassé.