L'autrier, par la matinee,
Entre un bois et un vergier,
Une pastore ai trovee
Chantant por soi envoisier ;
Et disoit en son premier :
« Ci me tient li maus d'amor ! »
Tantost cele part m'en tor
Que je l'oi desraisnier,
Si li dis sans delaier :
« Bele, Diex vos doint bon jor ! »

Mon salu sanz demoree
Me rendi et sanz targier ;
Molt ert fresche et colorée,
Si mi plot à acointier :
« Bele, vostre amor vos quier,
S'avroiz de moi riche ator. »
Elle respont : « Tricheor
Sont mes trop cil chevalier,
Mielz aim Perrin mon bergier
Que riche home gengleor. »

« Bele, ce ne dites mie :
Chevalier sont trop vaillant.
Qui set donc avoir amie
Ne servir a son talent
Fors chevalier et tel gent ?
Mès l'amors d'un bergeron
Certes ne vaut un boton.
Partez vos en a itant
Et m'amez : je vos creant 
De moi avroiz riche don. »

« Sire, par Sainte Marie !
Vos en parlez por neant.
Mainte dame avront trichie
Cil chevalier soudoiant.
Trop sont faus et mal pensant,
Pis valent que Guenelon.
Je m'en revois en meson,
Car Perrins qui mi atent
M'aime de cuer loiaument.
Abaissiez vostre raison. »

J'entendi bien la bergiere
Qu'ele me velt eschaper.
Molt li fis longue priere,
Mes n'i poi riens conquester.
Lors la pris a acoler,
Et ele gete un haut cri :
« Perrinet, trahi, trahi ! »
Du bois prenent a huper :
Je la lais sanz demorer,
Seur mon cheval m'en parti.

Envoi:
Quant elle m'en vit aler,
Elle dist par ramposner :
« Chevalier sont trop hardi. »