S'il est plaisir que je vous puisse faire,
Belle plaisant, courtoise et debonnaire,
Commandez le, et je l'acompliray
De cueur entier, ferme, certain et vray,
A qui que soit qu'il en doie desplaire.

N'espargniez pas mon labeur ne ma paine,
Employez moy: car de voulenté plaine
Vo gent corps vueil honnorer et servir,
Comme en amours ma dame souveraine,
La plus belle, la plus vraye et certaine
Que je scauroye en ce monde choisir.

Pourtant celer je ne vueil ne taire,
Ne je vueil point aler au contraire.
Ce que j'ay dit, je le dis et diray.
En ce ferme suis et tous temps seray,
Certainement, pour vostre amour attraire.

S'il est plaisir que je vous puisse faire,
Belle plaisant, courtoise et debonnaire,
Commandez le, et je l'acompliray
De cueur entier, ferme, certain et vray,
A qui que soit qu'il en doie desplaire.