Amour, dy moy de grace, (ainsi de tous humains,
Et des dieux soit tousjours l'empire entre tes mains)
  Qui te fournist de fleches,
Veu que tousjours colere en mill' et mille lieus,
Tu perds tes traitz ès coeurs des hommes et des Dieus
  Empennez de flammeches?

Mais je te pry dy moy, est-ce point le Dieu Mars,
Quand il revient chargé du butin des soudars
  Occis à la bataille?
Ou bien si c'est Vulcan qui dedans ses fourneaus
(Apres les tiens perduz) t'en refaict des nouveaus,
  Et tous-jours t’en rebaille !

Pauvret (respond Amour), et quoy ignores tu,
La rigueur, la douceur, la force et la vertu
  Des beaus yeus de t'amie?
Plus je repens de traitz sur hommes et sur Dieus,
Et plus en un moment m'en fournissement les yeus
  De ta belle Marie.