He Dieu du Ciel je n’eusse pas pensé,
Qu’un seul depart eust causé tant de peine :
Je n’ay sur moy nerf ny tendon, ny veine,
Foye, ny cœur qui n’en soit offensé.

Helas ! je suis à-demy trespassé,
Ains du tout mort, las ! Ma douce inhumaine,
Avecques elle, en s’en allant, emmaine
Mon pauvre cueur de ses beaux yeux blessé.

Que pleust à Dieu ne l’avoir jamais veüe !
Son œil si beau ne m’eust la flamme esmeüe
Par qui me faut un tourment recevoir :

Tel que ma main m’occiroit à ceste heure,
Sans un penser que j’ay de la revoir,
Et ce penser garde que je ne meure.