Amour, tu me fis voir pour trois grandes merveilles
Trois sœurs allant au soir leur pourmener sur l’eau
Qui croissoient à l’envy, ainsi qu’au renouveau
Croissent dans un pommier trois pommettes pareilles.

Toutes les trois estoient en beauté nompareilles,
Mais la plus jeune avoit le visage plus beau,
Et sembloit une fleur voisine d’un ruisseau,
Qui mire dans ses eaux ses richesses vermeilles.

Ores je souhaitois la plus vieille en mes vœus,
Et ores la moyenne, et ores toutes deux ;
Mais tousjours la plus jeune estoit en ma pensée ;

Et priois le Soleil de n’emmener le jour,
Car ma veüe en trois ans n’eust pas esté lassée
De voir ces trois Soleils qui m’enflammoient d’amour.