I.
 Je languis en piteux martire
 Pour vous, ma dame et ma maistresse,
 Car vostre amour tant je desire
 En bon semblant qui fait promesse.
 De bien aymer tant me detresse
 Que je mourray se plus empire
 Et se par vous mon mal ne cesse.
 Dictes le faire ou l'escondire
 Et me mectez hors de tristesse!

II.
 Ne faictes plus semblant de dire
 Que me voulez donner lyesse,
 Se brief ne voulez estre mire
 De ma douleur par vostre humblesse.
 Doulx semblant n'est pas l'oeil qui blesse.
 Regardez mon cuer qui souspire,
 Et ne me faictes pas rudesse.
 Autre que vous je ne desire,
 Ne me tenez plus en crudece.