Ouwê, der sô sælic wære, 
Der uns kunde geben rât 
Für die manicvalden swære,  
Dâ diu werlt mit umbe gât! 
Ouwê sô gemeiner sorgen! 
Wâ hât freude sich verborgen? 
Die envinde ich hie noch dâ.  

Möht ich iender freude vinden, 
Dâ fund ich ouch êre bî. 
Durch daz sol ich niht erwinden, 
Ich envinde, wâ sie sî. 
Und erwirbe ich freude und êre, 
Waz bedarf ich sælden mêre? 
Wie kan mir gelingen baz?  

Rehter freuden, swer der waldet, 
Der hât immer nieuwe jugent: 
Sô tuot sorge, daz man aldet, 
Und verderbet mange tugent. 
Freude ist süeze, sorge ist sûre.  
Ich was sorgen nâchgebûre: 
Diu hât mir erleidet sich. 

Durch daz sol ouch ich sie leiden 
Guoten liuten, swâ ich kan. 
Mag ich, ich wil von ir scheiden, 
Von ir sîn ein vrîer man. 
Got vor sorgen mich behüete: 
dar zuo bit ich wîbes güete, 
Daz ir huote mich bewar.  

Guotiu wîp süez unde reine, 
Derst noch wunder, swâ sie sîn. 
Hei fund ich der guoten eine! 
Der gæb ich daz herze mîn. 
Ich wold ir ze hulden singen, 
Ir lop alsô hôhe bringen, 
Daz sies müeste danken mir.  

Got geb, daz ich sie noch vinde, 
Der gemüete sî sô guot, 
Daz sie sich mîn underwinde, 
Mir ze hœhen mînen muot. 
Vinde ich die, sô vinde ich êre, 
Sô getrûre ich nimmer mêre: 
Nimmer wirde ich mêr unfrô.