Heureuse est la peine
De qui le plaisir
A sur foy certaine 
Assis son desir.

L'on peult assés en servant requerir,
Sans toutesfois par souffrir acquerir
Ce, que l'on pourchasse
Par trop desirer,
Dont en male grace
Se fault retirer.

Car un tel service 
Ne pretend qu'au poinct,
Qui par commun vice
L'honneur picque, et poinct.

Et ce travail en fumée devient 
Toutes les fois, que la raison survient,
Qui tousjours domine
Tout cueur noble, et hault,
Et peu à peu mine
Le plaisir, qui fault.

Mais l'attente mienne
Est le desir sien,
D'estre toute sienne,
Comme il sera mien.

Car quand Amour à Vertu est uny,
Le cueur conçoit un desir infiny,
Qui tousjours desire
Tout bien hault, et sainct,
Qui de doulx martire
L'environne, et ceinct.

Car il luy engendre
Une ardeur de veoir,
Et tousjours apprendre
Quelque hault sçavoir.

Le sçavoir est ministre de Vertu,
Par qui Amour vicieux est batu,
Et qui le corrige,
Quand dessus le cueur 
Par trop il se erige
Pour estre vainqueur.

C'est pourquoy travaille 
En moy cet espoir,
Qui desir me baille
Et veoir, et sçavoir.

Estant ainsi mon espoir asseuré,
Je ne crainct point, qu'il soit demesuré :
Mais veulx bien qu'il croisse
De plus en plus fort,
A fin qu'apparoisse
Mon cueur ferme, et fort.

Et que tousjours voye,
Travaillant ainsi,
Tenir droict la voye
D'immortel soucy.

Si donc il veult en si hault lieu monter,
Qu'il puisse Amour, et la Mort surmonter,
Sa caducque vie
Devra soulager
D'une chaste envie
Pour l'accourager.

Ainsi m'accompaigne
Un si hault desir
Que pour luy n'espargne
Moy, ne mon plaisir.