Le cler Ruysselet courant,
Murmurant
Aupres de l'hospitale Vmbre
Plaist à ceux, qui sont lassez,
Et pressez
De chault, de soif, & d'encombre.

Et ceux, qu'Amour uient saisir,
Leur plaisir
C'est parler de luy souuent.
D'Amour soyez doncq' mes Chantz,
Par ces Champs
Dessoubz la frescheur du Vent.

Ces Eaux cleres, et bruyantes,
Eaux fuyantes
D'un Cours assez doulx, & lent
Donneront quelque froideur
A l'ardeur
De mon feu trop uiolent.

Erato, à ma Chanson
Donne Son,
Et me permetz approcher
Pres de toy pour m'esiouyr,
Et t'ouyr
Du hault de ce creux Rocher.

Le Roy, le Pere des Dieux
Tient les Cieux
Dessoubz son obeïssance,
Neptune la Mer tempere,
Et son frere
Sur les Enfers a puissance.

Mais ce petit Dieu d'aymer,
Ciel, & Mer,
Et le plus bas de la Terre
D'un Sceptre uictorieux
Glorieux
Soubz son pouuoir tient, & serre.

Sans luy, du Ciel le haut Temple
Large, & ample,
En ruyne tumberoit,
Auecq' chacun Element,
Tellement
Discorde par tout seroit.

Amour gouuerneur des Villes
Loix Ciuiles,
Et iuste Police ordonne,
Et l'heur de Paix, qu'on ua tant
Souhaitant,
C'est luy seul, qui le nous donne.

Les Richesses de Ceres,
Les forestz,
Les Sepz, les Plantes, & Fleurs
Prennent d'Amour origine,
Goust, Racine,
Vertu, Formes, & Couleurs.

Par luy tout genre d'Oyzeaux
Sur les Eaux
Et par les Boys s'entretient.
Tout Animal de seruaige,
Et sauuaige
De luy son Essence tient.

Par ce petit Dieu puissant,
Delaissant
Le doulx Gyron de la Mere
La Vierge femme se treuue
Et fait preuue
De la flamme doulce amere.

Que me chaut si on le blasme,
Et sa flamme?
Amour ne scait abuser
Et ceux, qui mal en recoyuent,
Ne le doyuent,
Mais eux mesmes accuser.

Amour est tout bon, & beau,
Son flambeau
N'enflamme les Vicieux:
Iuste est, & de simple foy,
C'est pourquoy
II est tout nu, & sans yeux,

Leurs uictorieux Charroys
Ducz, & Roys
Doyvent a ses sainctz Autelz,
Le Poetique ouurier
Son Laurier,
Et les Dames leurs Beautez.

Puis doncq' qu'il est notre autheur
Sa Haulteur
Bien adorer nous deuons,
Dessus son Autel sacré
Saichant gré
A luy, de quoy nous uiuons.

La Ieunesse (helas) nous fuyt
Et la suyt
Le froid Aage languissant,
Adonques sont inutiles
Les Scintiles
Du feu d'Amour perissant.