Y ceiliog mwyalch balchbwyll,
Dawn i'th dal, a Duw ni'th dwyll.
Cyfion mewn glyn d'emyn di,
Cyson o union ynni.
Crefyddwr wyd anwydawl,
Cerdi fi, croyw yw dy fawl.

Gwisgaist, enynnaist annerch,
Gwisg ddu, nid er selu serch,
Gwisg a ddanfones Iesu
Is dail it o sae du,
A dwbwl gwell no deuban,
Mawr ei glod, o'r mwrrai glan;
Sidan gapan am gopa
Yn ddu rhoed yn ddiau'r ha',
Dwbled harddgled mewn rhedyn
Blac-y-lir uwch glandir glyn.
Muchudd dy ddeurudd eirian,
Pig cwrel gloyw, angel glan.

Prydydd wyd medd proffwydi,
Cywyddol maenol i mi,
Awdur cerdd adar y coed,
Esgud cyw mwyndrud meindroed.
Os gwyddost yn osgeiddig
Annerch gwen dan bren a brig,
Os gwn innau o newydd,
Sgwir gwawd, ysgwier y gwydd,
Ganu moliant a'i wrantu
I ti, y ceiliog, wyt du.
Du yw dy gwfwl, da ion,
A'th gasul, edn iaith gyson.

Mydriwr wyd a broffwydais,
Medrud son uwch Medrod Sais.
Duw a'th gatwo, tro traserch,
Adain syw, edn y serch.