De nouiau mestuet chanter
el tens que plus sui marriz
quant ne puis merci trouer
bien doi chanter a enuiz
ne ie nos ali parler
de ma chancon fas message
que tant est cortois et sage
que ne puis aillors penser

Se ie peusse oublier
sa biaute et ses bons dis
et son douz uis esgarder
bien peusse estris garis
mais nen puis mon cuer oster
espoir sai fait grant folage
mais moi lestuet en durer

Chascuns dit quil muert damer
mais ie nen quier morir
melz aim soufrir ma dolor
uiure et atendre et languir
quele me peut bien merir
mes max et ma consiuree
naime pas adroit qui bee
que len porroit auenir

Dame quia grant paor
souuent lestuet esbahir
et penser atel folor
dont ie ne me puis tenir
sil est auostre plaisir
siert bien ma poine sauuee
que seul dela desirree.
me fait mon cuer resbaudir

Nus ne puet grant ioie auoir
sil ne rades maus apris
qui touz iors fait son uoloir
apoines ert ia fins amis
por ce fait amors doloir
quele ueut guerredon rendre
ceus qui bien seuent atendre
et seruir a son uoloir

Dame de tout mon pooir
motroi auos sans contendre
que sans uos ne me peut rendre
nus biens ne ne puet ualoir