Quatre Rondels attribués à Françoys Villon

Une fois me dictes ouy,
En foy de noble et gentil femme ;
Je vous certifie, ma Dame, 
Qu'oncques ne fuz tant resjouy.

Veuillez le donc dire selon
Que vous estes benigne et doulce,
Car ce doulx mot n'est pas si long 
Qu'il vous face mal en la bouche. 

Soyez seure, si j'en jouy,
Que ma lealle et craintive ame 
Gardera trop mieulx que nul ame 
Vostre honneur... Avez-vous ouy ? 
Une fois me dictes ouy.

Puisqu'il fault que je le vous die,
D'amours ne viennent pas mes plains ; 
Mais, par ma foy, je me complains 
De ma finance, helas ! faillie. 
De ces amours c'est bien du meins, 
Car j'ay plus dure maladie, 
Puisqu'il fault que je le vous die. 

Car, quand la bourse n'est garnie
Et qu'on n'a plus que mettre aux mains, 
L'on n'ose aller, par tous les saints, 
En nulle bonne compaignie,
Puisqu'il faut que je le vous die.

Adieu vous dy la lerme à l’œil ;
Adieu, ma très gente mignonne,
Adieu, sur toutes la plus bonne,
Adieu vous dy, qui m’est grand dueil.

Adieu, adieu, m’amour, mon vueil ;
Mon povre cueur vous laisse et donne.
Adieu vous dy la lerme à l’œil.

Adieu, par qui du mal recueil
Mille fois plus que mot ne sonne ;
Adieu, du monde la personne
Dont plus me loue et plus me dueil.
Adieu vous dy la lerme à l’œil.

Bon jour, bon an, bonne semaine, 
Honneur, santé, joye prochaine, 
Perseverer de bien en mieulx 
Et joye d'amours vous doint Dieux ;
Ce jour present, en bonne estraine,
Dame belle trop plus qu'Helaine ;
Tousjours d'argent la bourse plaine ;
Vivre longtemps sans estre vieulx ;
Bon jour, bon an, bonne semaine.

Après ceste vie mondaine,
Avoir la joye souveraine :
De là ravis lassus ès cieulx,
Où nous nous puissions veoir joyeux 
Sans jamais sentir grief ne paine ;
Bon jour, bon an, bonne semaine.