Bon jour, bon an, bonne semaine, 
Honneur, santé, joye prochaine, 
Perseverer de bien en mieulx 
Et joye d'amours vous doint Dieux ;
Ce jour present, en bonne estraine,
Dame belle trop plus qu'Helaine ;
Tousjours d'argent la bourse plaine ;
Vivre longtemps sans estre vieulx ;
Bon jour, bon an, bonne semaine.

Après ceste vie mondaine,
Avoir la joye souveraine :
De là ravis lassus ès cieulx,
Où nous nous puissions veoir joyeux 
Sans jamais sentir grief ne paine ;
Bon jour, bon an, bonne semaine.