S'elle m'amera je ne scay
Mais je me mectray en essay
D'acquerir quelque peu sa grace
Force m'est que par la je passe
Ceste fois j'en feray l'essay

L'autre jour tant je m'avençay
Que presque tout mon cuer lessay
Aller sans que luy demandasse.
    S'elle m'amera je ne scay
    Mais je me mettray en essay
    D'acquerir quelque peu sa grace

Puis apres le cop me pensay
Que lonctemps a que ne cessay
Ne ne fut que je ne l'amasse
Mais c'est ung jeu de passe passe
J'en suis comme je començay

    S'elle m'amera je ne scay
    Mais je me mettray en essay
    D'acquerir quelque peu sa grace
    Force m'est que par la je passe
    Ceste fois j'en feray l'essay

Petite camusette, à la mort m'avez mis.
Robin et Marion s'en vont au bois joly.
Ilz s'en vont, ilz s'en vont bras à bras,
ilz se sont endormis. 
Petite camusette, à la mort m'avez mis.