Je voudroy bien richement jaunissant
En pluye d’or goute à goute descendre
Dans le giron de ma belle Cassandre,
Lors qu'en ses yeux le somne va glissant.

Je voudroy bien en toreau blanchissant
Me transformer pour finement la prendre,
Quand elle va par l'herbe la plus tendre
Seule, à l'ecart, mille fleurs ravissant.

Je voudroy bien pour alleger ma peine,
Estre un Narcisse et elle une fontaine,
Pour m'y plonger une nuict à sejour :

Et voudroy bien que ceste nuict encore
Fust eternelle, et que jamais l'Aurore
D'un front nouveau nous rallumast le jour.