Quand je vous voy, ma gentille maitresse,
Je deviens fol, sourd, muet, et sans ame,
Dedans mon sein mon pauvre coeur se pasme,
Entre surpris de joye et de tristesses.

Par tout mon chef le poil rebours se dresse,
De glace froide une fiebvre m'enflamme
Venes et nerfs: en tel estat, madame,
Je suis pour vous, quand à vous je m'adresse.

Mon oeil creint plus les vostres qu'un enfant
Ne creint la verge, ou la fille sa mere,
Et toutesfois vous ne m'estes severe

Sinon au point que l'honneur vous defend:
Mais c'est assez, puis que de ma misere
La garison d'autre part ne despend.