Si j'estois Jupiter, Sinope, vous seriez
Mon espouse Junon: si j'estois Roy des ondes,
Vous seriez ma Thétys, Roine des eaux profondes
Et pour vostre maison la grand' mer vous auriez:

Si la terre estoit mienne avec moy vous tiendriez
L'empire sous vos mains, dame, des terres rondes,
Et dessus une coche en belles tresses blondes
Par le peuple en honneur déesse vous iriez.

Mais je ne suis pas Dieu et si ne le puis estre,
Pour telles dignitez le ciel ne m'a fait naistre,
Mais je voudrois avoir changé de bonnet rond,

Et vous avoir chez moy pour ma chere espousée:
Toute ainsi que la nege au chaut soleil se fond
Je me fondrois en vous d'une douce rousée.