Amour archer d'une tirade ront
Cent traitz sur moy, et si ne me conforte
D'un seul regard, celle pour qui je porte
Le cuoeur aux yeulx, les pensers sus le front.

D'un Soleil part la glace qui me fond,
Et m'esbays que ma froydeur n'est morte
Au feu d'un oeil, qui d'une flamme accorte
Me fait au cueur un ulcere profond.

En tel estat je voy languir ma vie,
Qu'aux plus chetifz ma langueur porte envie,
Tant le mal croist et le cuoeur me deffault:

Mais la douleur qui plus comble mon ame
De desepoir, c'est qu'Amour et Madame
Scavent mon mal, et si ne leur en chault.