Les Amours de Pierre de Ronsard à 4 parties, Livre 1

Qui voudra voir comme un Dieu me surmonte, 
Comme il m'assaut, comme il se fait vainqueur, 
Comme il renflamme et renglace mon coeur, 
Comme il reçoit un honneur de ma honte;
 
Qui voudra voir une jeunesse prompte, 
Qui voudra voir un sujet de malheur, 
Me vienne lire; il lira ma douleur, 
Dont ma maîtresse et Amour ne font compte; 

Il connaîtra que faible est la raison 
Contre son trait, quand sa douce poison 
Corrompt le sang, tant le mal nous enchante;
 
Et connaîtra que je suis trop heureux 
D'être en mourant nouveau cygne amoureux, 
Qui son obsèque à soi-même se chante.

Nature ornant la dame qui devoyt
De sa douceur forcer les plus rebelles,
Luy fit present des beautez les plus belles,
Que des mille ans en espargne elle avoyt

Tout ce qu'Amour avarement couvoyt,
De beau, de chaste, et d'honneur soubz ses ailles,
Emmiella les graces immortelles
De son bel oeil qui les dieux emouvoyt.

Du ciel à peine elle estoyt descendue,
Quand je la vi, quand mon ame ésperdue
En devint folle: et d'un si poignant trait,

Le fier destin l'engrava dans mon ame,
Que vif ne mort, jamais d'une aultre dame
Empraint au cuoeur je n'auray le portraict.

Dans le serein de sa jumelle flamme
Je vis Amour, qui son arc desbandoit,
Et sus mon cuoeur le brandon éspandoit,
Qui des plus froids les moëlles enflamme.

Puis çà puis là pres les yeulx de ma dame
Entre cent fleurs un retz d'or me tendoit,
Qui tout crespu blondement descendoit
A flotz ondez pour enlasser mon ame.

Qu'eussay-je faict l'Archer estoit si doulx,
Si doulx son feu, si doulx l'or de ses noudz,
Qu'en leurs filetz encore je m'oublie:

Mais cest oubli ne me tourmente point,
Tant doulcement le doulx Archer me poingt,
Le feu me brusle, et l'or crespe me lie.

Je parangonne au soleil que j’adore
L’autre soleil. Cestuy là de ses yeux
Enlustre, enflamme, enlumine les Cieux
Et cestuy-cy toute la terre honore.
 
L’Art, la nature et les astres encore
Les Elements, les Grâces et les Dieux
Ont prodigué le parfaict de leur mieux,
Dans son beau jour qui le nostre décore.
 
Heureux, cent foys heureux, si le destin
N’eust emmuré d’un rampart aymantin
Si chaste cueur dessoubz si belle face :
 
Et plus heureux si je n’eusse arraché
Mon cueur de moy pour l’avoir attaché
De clous de feu sur le froid de sa glace !

Ces liens d'or, ceste bouche vermeille,
Pleine de lis, de roses et d'oeillets,
Et ces couraux doublement vermeillets,
Et ceste joue a l'Aurore pareille :
 
Ces mains, ce col, ce front, et ceste oreille,
Et de ce sein les boutons verdelets
Et de ces yeux les astres jumelets,
Qui font trembler les ames de merveille,
 
Firent nicher Amour dedans mon sein,
Qui gros de germe avoit le ventre plein
D'oeufs non formez et de glaires nouvelles,
 
Et, lui couvant -- qui de mon cueur jouit
Neuf mois entiers  -- en un jour m'eclouit
Milles amoureaux chargez de traits et d'aisles

Bien qu’à grand tort il te plaist d’allumer
Dedans mon coeur, siège à ta seigneurie,
Non d’une amour, ainçois d’une Furie
Le feu cruel pour mes os consumer,
 
L’aspre tourment ne m’est point si amer,
Qu’il ne me plaise, et si n’ay pas envie
De me douloir,  car je n’aime ma vie,
Sinon d’autant qu’il te plaist de l’aimer.
 
Mais si les cieux m’ont faict naistre, Madame,
Pour estre tien, ne gesne plus mon ame,
Mais prends en gré ma firme loyauté.
 
Vaut-il pas mieux en tirer du service,
Que par l’horreur d’un cruel sacrifice
L’occire aux pieds de ta fière beauté ?

Qui voudra voir dedans une jeunesse
La beauté jointe avec la chasteté,
L'humble douceur, la grave majesté,
Toutes vertus et toute gentilesse;

Qui voudra voir les yeux d'une déesse
Et de nos ans la seule nouveauté,
De ceste dame oeillade la beauté,
Que le vulgaire appelle ma maistresse.

Il apprendra comme Amour rit et mord,
Comme il guarit, comme il donne la mort;
[Puis il dira, voyant chose si belle:

Heureux, vraiment, heureux qui peut avoir
Heureusement cet heur que de la voir,
Et plus heureux qui meurt pour l'amour d'elle!]1

Amour, Amour, donne moy paix ou treve,
Ou bien retire, et d'un garrot plus fort
Tranche ma vie et m'avance la mort.
Me bienheurant d'une langeur plus breve.

Soit que la jour se couche ou se releve
Je sens toujours un penser qui me mord.
Et malheureux en si heureux effort.
Me faict la guerre, et mes peines rengrève.

Que doy-je faire ?  Amour me fait errer
Si hautement, que je n'ose esperer
De mon salut que la desesperance.

Puis qu'Amour donc ne me veut secourir
Pour me defendre il me plait de mourir.
Et par la mort trouver ma delivrance.

Mon Dieu, mon Dieu, que ma maistresse est belle !
Soit que j'admire ou ses yeux mes seigneurs,
Ou de son front la grâce et les honneurs,
Ou le vermeil de sa lèvre jumelle.

Amour, amour, que ma dame est cruelle !
Soit qu'un dédain rengrége mes douleurs.
Soit qu'un dépit fasse naître mes pleurs,
Soit qu'un refus mes plaies renouvelle.

Ainsi le miel de sa douce beauté
Nourrit mon cœur : ainsi sa cruauté
D'un fiel amer aigrit toute ma vie :

Ainsi repu d'un si divers repas,
Ores je vis, ores je ne vis pas,
Égal au sort des frères d'Œbalie.

Tes yeux divins me promettent le don
Qui d'un espoir me renflamme et renglace.
Las! mais j'ay peur qu'ils tiennent de la race
De ton ayeul le roy Laomedon.

Au flamboyer de leur double brandon
De peu à peu l'esperance m'embrasse,
Ja prevoyant par l'accueil de leur grace,
Que mon service aura quelque guerdon.

Tant seulement ta bouche m'espouvante,
Bouche vrayment qui, prophete, me chante
Tout le rebours de tes yeux amoureux.

Ainsi je vis, ainsi je meurs en doute;
L'un me rappelle et l'autre me reboute,
D'un seul objet heureux et mal-heureux.

Ces deux yeulx bruns, doux flambeaux de ma vie,
Dessus les miens respandant leur clarté,
Ont arresté ma jeune liberté,
Pour la damner en prison asservie.

De ses deux yeux ma raison fut ravie,
Si qu'esblouy de leur grand' beaulté,
Opiniastre à garder loyaulté
Aultres yeulx voyr depuis je n'euz envie.

D'autre esperon mon Tyran ne me poingt,
Aultres pensers en moy ne logent point,
Ny aultre idole en mon cuoeur je n'adore.

Ma main ne sçait cultiver aultre nom,
Et mon papier n'est esmaillé, si non
De ses beaultez que ma plume colore.

Las, je me plain de mille et mille et mille
Souspirs, qu'en vain des flancz je vais tirant,
Heureusement mon plaisir martirant
Au fond d'une eau qui de mes pleurs distille.

Puis je me plain d'un portraict inutile,
Ombre du vray que je suis adorant,
Et de ces yeulx qui me vont devorant,
Le cuoeur bruslé d'une flamme gentille.

Mais parsus tout je me plain d'un penser,
Qui trop souvent dans mon cuoeur faict passer
Le souvenir d'une beaulté cruelle,

Et d'un regret qui me pallist si blanc,
Que je n'ay plus en mes veines de sang,
Aux nerfz de force, en mes oz de moëlle.

Je voudrois estre Ixion et Tantale,
Dessus la rouë et dans les eaux là bas,
Et nu à nu presser entre mes bras
Ceste beauté qui les anges égale.

S'ainsi estoit, toute peine fatale
Me seroit douce et ne me chaudroit pas,
Non, d'un vautour fussé-je le repas,
Non, qui le roc remonte et redevale.

Luy tastonner seulement le tetin,
A descouvert, changeroit mon destin
Au sort meilleur des princes de l'Asie :

Un demy-dieu me feroit son baiser,
Et flanc à flanc entre ses bras m'aiser,
Un des grands Dieux qui mangent l'ambroisie.

Las ! Pleust à Dieu n'avoir jamais tasté
Si follement le tetin de m'amie!
Sans luy vrayment, l'autre plus grande envie
Helas ! ne m'eust jamais le coeur tenté

Comme un poisson, pour s'estre trop hasté
Par un appast, suit la fin de sa vie,
Ainsi je vais où la mort me convie,
D'un beau tetin doucement apasté.

Qui eust pensé que le cruel destin
Eust enfermé sous un si beau tetin
Un si grand feu, pour m'en faire la proye?

Avisez donc quel seroit le coucher
Entre ses bras, puis qu'un simple toucher
De mille morts sans joüir me foudroye!

Amour me tue, et si je ne veus dire
  Le plaisant mal que ce m'est de mourir:
  Tant j'ay grand peur, qu'on voulust secourir
  Ce doux tourment pour lequel je soupire.

Il est bien vray, que ma langueur desire
  Qu'avec le tans je me puisse guerir:
  Mais je ne veus ma dame requerir
  Pour ma santé: tant me plait mon martire.

Tay toy langueur: je sen venir le jour,
  Que ma maistresse, après si loing sejour,
  Voyant le soing qui ronge ma pensée,

Tout' une nuict, folatrement m'aiant
  Entre ses bras, prodigu', ira paiant
  Les interés de ma pein' avancée.

Ha, seigneur dieu, que de graces écloses
Dans le jardin de ce sein verdelet,
Enflent le rond de deus gazons de lait,
Où des Amours les fléches sont encloses!

Je me transforme en cent metamorfoses,
Quand je te voi, petit mont jumelet,
Ains du printans un rosier nouvelet,
Qui le matin caresse de ses roses.

S'Europe avoit l'estomac aussi beau,
De t'estre fait, Jupiter, un toreau,
Je te pardonne. Hé, que ne sui-je puce!

La baisotant, tous les jours je mordrois
Ses beaus tetins, mais la nuit je voudrois
Que rechanger en homme je me pusse.

Avéques moi pleurer vous devriés bien,
Tertres bessons, pour la facheuse absence
De cette là, qui fut par sa presence
Vôtre Soleil, ainçois qui fut le mien.

Las! de quels maus, Amour, et de combien
Une beauté ma peine recompense!
Quand plein de honte à toute heure je pense
Qu'en un moment j'ai perdu tout mon bien.

Or, à dieu donc beauté qui me dédaigne:
Quelque rocher, quelque bois, ou montaigne
Vous pourra bien éloigner de mes yeus:

Mais non du coeur, que pront il ne vous suive,
Et que dans vous, plus que dans moi, ne vive,
Comme en la part qu'il aime beaucoup mieus.

Tout me déplait, mais rien ne m'est si gref,
Que ne voir point les beaus yeus de ma Dame,
Qui des plaisirs les plus dous de mon ame
Avéques eus ont emporté la clef.

Un torrent d'eau s'écoule de mon chef:
Et tout confus de soupirs je me pâme,
Perdant le feu, dont la drillante flame
Seule guidoit de mes pensers la nef.

Depuis le jour, que je senti sa braise,
Autre beauté je n'ai veu, qui me plaise,
Ni ne verrai. Mais bien puissai-je voir

Qu'avant mourir seulement cette Fere
D'un seul tour d'oeil promette un peu d'espoir
Au coup d'Amour, dont je me desespere.

Telle est dedans ma souvenance
 . . . . . . . . . .

— The rest of this text is not
currently in the database but will be
added as soon as we obtain it. —

Si doucement le souvenir me tente 
 . . . . . . . . . .

— The rest of this text is not
currently in the database but will be
added as soon as we obtain it. —

Amour archer d'une tirade ront
Cent traitz sur moy, et si ne me conforte
D'un seul regard, celle pour qui je porte
Le cuoeur aux yeulx, les pensers sus le front.

D'un Soleil part la glace qui me fond,
Et m'esbays que ma froydeur n'est morte
Au feu d'un oeil, qui d'une flamme accorte
Me fait au cueur un ulcere profond.

En tel estat je voy languir ma vie,
Qu'aux plus chetifz ma langueur porte envie,
Tant le mal croist et le cuoeur me deffault:

Mais la douleur qui plus comble mon ame
De desepoir, c'est qu'Amour et Madame
Scavent mon mal, et si ne leur en chault.

Je vy ma Nymphe entre cent damoyselles,
Comme un Croyssant par les menuz flambeaulx,
Et de ses yeulx plus que les astres beaulx
Faire obscurcir la beaulté des plus belles.

Dedans son sein les graces immortelles,
La Gaillardize, et les freres jumeaux,
Alloyent vollant comme petitz oyseaux
Par my le verd des branches plus nouvelles.

Le ciel ravy, que si belle la void,
Roses, et liz, et girlandes pleuvoyt
Tout autour d'elle au meillieu de la place:

Si qu'en despit de l'hyver froydureux,
Par la vertu de ses yeulx amoureux,
Un beau printemps s'esclouit de sa face.

Le ciel ne veut, Dame, que je jouysse
De ce doux bien que dessert mon devoir ;
Aussi ne veu-je, et ne me plaist d'avoir
Sinon du mal en vous faisant service.

Puisqu'il vous plaist que pour vous je languisse,
Je suis heureux, et ne puis recevoir
Plus grand honneur, qu'en trespassant me voir
Faire à voz yeux de mon cœur sacrifice.

Donc si ma main, maugré moi, quelque fois
De l'amour chaste outrepasse les Loix,
Dans vostre sein cherchant ce qui m'embraise,

Punisses-la d'un seul trait de vos yeux,
Et la brules : car j'ayme beaucoup mieux
Vivre sans main, que ma main vous déplaise.

Quand en songeant ma folâtre j'acolle,
Laissant mes flancs sur les siens s'allonger,
Et que, d'un branle habilement léger,
En sa moitié ma moitié je recolle !

Amour adonc si follement m'affole,
Qu'un tel abus je ne voudroi changer,
Non au butin d'un rivage étranger,
Non au sablon qui jaunoie en Pactole.

Mon dieu, quel heur, et quel consentement,
M'a fait sentir ce faux recollement,
Changeant ma vie en cent métamorphoses !

Combien de fois, doucement irrité,
Suis-je ore mort, ore ressuscité,
Entre cent lis et cent merveilles roses !

Je parangonne à ta jeune beauté.
Qui toujours dure en son printemps nouvelle.
Ce mois d'avril qui ses fleurs renouvelle,
En sa plus gaie et verte nouveauté.

Loin devant toi s'en fuyt la cruauté :
Devant lui fuit la saison plus cruelle.
Il est tout beau, ta face est toute belle :
Ferme est son cours, ferme est ta loyauté :

Il peint les champs de dix mille couleurs,
Tu peins mes vers d'un long émail de fleurs :
D’un doux Zefyr il fait onder les plaines,

Et toy mon cœur d’un soupir larmoyant :
D’un beau cristal son front est rosoyant,
Tu fais sortir de mes yeux deux fontaines.

Ce ne sont qu'haims, qu'amorces et qu'appas
De son bel œil qui m'alléche en sa nasse,
Soit qu'elle rie, ou soit qu'elle compasse
Au son du luth le nombre de ses pas.

Une minuit tant de flambeaux n'a pas,
Ny tant de sable en Euripe ne passe,
Que de beautez embellissent sa grace,
Pour qui j'endure un millier de trespas.

Mais le tourment qui moissonne ma vie
Est si plaisant que je n'ay point envie
De m'esloigner de sa douce langueur.

Ains face Amour que mort encore j'aye
L'aigre douceur de l amoureuse playe
Que vif je porte au rocher de mon cœur.

Oeil, qui mes pleurs de tes rayons essuye',
Sourci, mais ciel des autres le greigneur,
Front estoylé, Trophée à mon Seigneur,
Qui dans ton jour ses despouilles étuye:

Gorge de marbre, où la beaulté s'appuye,
Col Albastrin emperlé de bonheur,
Tetin d'ivoyre où se niche l'honneur,
Sein dont l'espoyr mes travaulx desennuye:

Vous avez tant appasté mon desir,
Que pour souler la faim de son plaisir,
Et nuict et jour il fault qu'il vous revoye.

Comme un oyseau, qui ne peult sejourner,
Sans revoler, tourner, et retourner,
Aux bordz congneuz pour y trouver sa proye.

Heureuse fut l'estoile fortunée,
Qui d'un bon œil ma maistresse aperceut :
Heureux le bers, et la main qui la sçeut
Emmaillotter, alors qu'elle fut née.
 
Heureuse fut la mammelle en-mannée
De qui le lait premier elle reçeut :
Et bien-heureux le ventre qui conceut
Si grand' beauté de si grands dons ornée !
 
Heureux les champs qui eurent cet honneur
De la voir naistre, et de qui le bon-heur
L'Inde et l'Egypte heureusement excelle !
 
Heureux le fruit dont grosse elle sera,
Mais plus heureux celuy qui la fera
Et femme et mere, en lieu d'une pucelle !

Je veux mourir pour tes beautés, Maîtresse,
Pour ce bel oeil, qui me prit à son hain,
Pour ce doux ris, pour ce baiser tout plein
D'ambre et de musc, baiser d'une Déesse.

Je veux mourir pour cette blonde tresse,
Pour le mignard embonpoinct de ce sein,
Pour la rigueur de cette douce main,
Qui tout d'un coup me guérit et me blesse.

Je veux mourir pour le brun de ce teint,
Pour ce maintien qui, divin, me contraint
De trop aymer : mais par sus toute chose.

Je veux mourir ès amoureux combats,
Soûlant l'amour, qu'au cœur je porte enclose,
Toute une nuit au milieu de tes, bras.

Doux fut le trait qu'Amour hors de sa trousse
Pour me tuer me tira doucement,
Quand je fus pris au doux commencement
D’une douceur si doucettement douce.

Doux est son ris et sa voix qui me pousse
L'âme du corps qui s’en fuit hautement
Devant son chant accordé proprement
Avec mes vers animez de son pouce.

Telle douceur sa voix coule en bas,
Que sans l’oüir l’amoureux ne sçait pas,
Comme en ses rets Amour nous encordelle.

Sans l'ouir, dis-je, Amour mesme enchanter,
Doucement rire, et doucement chanter,
Et moy mourir doucement auprès d'elle.

Ce ris plus doulx que l'oeuvre d'une abeille,
Ces doubles liz doublement argentez,
Ces diamantz à double ranc plantez
Dans le coral de sa bouche vermeille,

Ce doulx parler qui les mourantz esveille,
Ce chant qui tient mes soucis enchantez,
Et ces deux cieulx sur deux astres antez,
De ma Deesse annoncent la merveille.

Du beau jardin de son printemps riant,
Naist un parfum, qui mesme l'orient
Embasmeroit de ses doulces aleines.

Et de là sort le charme d'une voix,
Qui touts raviz fait sauteler les boys,
Planer les montz, et montaigner les plaines.

Qu’en tout endroit toute chose se muë 
 . . . . . . . . . .

— The rest of this text is not
currently in the database but will be
added as soon as we obtain it. —

Cet œil besson dont goulu je me pais,
Qui fait rocher celuy qui s’en approuche, 
Ore d’un ris, or’ d’un regard farouche 
Nourrit mon cœur en querelle et en paix. 

Par vous, bel œil, en souffrant je me tais ;
Mais, aussitost que la douleur me touche, 
Toy, belle, saincte, et angelique bouche, 
De tes douceurs re-vivre tu me fais.

Bouche, pourquoy me viens-tu secourir, 
Quand ce bel œil me force de mourir ? 
Pourquoy veux-tu que vif je redevienne ? 

Las ! bouche, las ! je revis  en langueur, 
Pour plus de soin, afin que le soin vienne, 
Plus longuement se paistre de mon cœur. 

Prenez mon cœur, dame, prenez mon cœur 
 . . . . . . . . . .

— The rest of this text is not
currently in the database but will be
added as soon as we obtain it. —

Beauté dont la douceur pourroit vaincre les Rois,
Mon cœur que vous tenez dans vos yeux en servage,
Helas, rendez le moy, ou me baillez en gage
Le vostre, car sans cœur vivre je ne pourrois.

Quand mort en vous servant sans mon cœur je serois,
Plus que vous ne pensez ce vous seroit dommage
De perdre un tel amy : à moy, grand avantage,
Grand honneur et plaisir quand pour vous je mourrois.

Ainsi nous ne pouvons encourir de ma mort
Vous, madame, qu’un blâme, et moy qu’un reconfort,
Pourveu que mon trespas vous plaise en quelque chose :

Et veux que sur ma Làme Amour aille escrivant,
CELUY QUI GIST ICY, SANS COEUR ESTOIT VIVANT,
ET TRESPASSA SANS COEUR, ET SANS COEUR IL REPOSE.