Lanquan li jorn son lonc en mai 
M•es belhs dous chans d'auzelhs de lonh 
E quan me sui partitz de lai 
Remembra•m d'un amor de lonh: 
Vau de talan embroncz e clis 
Si que chans ni flors d'albespis 
No•m platz plus que l'iverns gelatz. 

Ben tenc lo Senhor per verai 
Per qu'ieu veirai l'amor de lonh; 
Mas per un ben que m'en eschai 
N'ai dos mals, car tan m•es de lonh. 
Ai! car me fos lai pelegris, 
Si que mos fustz e mos tapis 
Fos pels sieus belhs huelhs remiratz! 

Iratz e jauzens m'en partrai, 
S'jeu ja la vei, l'amor de lonh; 
Mas non sai quoras la veirai, 
Car trop son nostras terras lonh: 
Assatz i a pas e camis, 
E per aisso non•n sui devis... 
Mas tot sia com a Dieu platz!
 
Ai! car me fos lai pelegris, 
Si que mos fustz e mos tapis 
Fos pels sieus belhs huelhs remiratz!