C’est grand cas que d’aimer : si je suis une année
Avecque ma maistresse à deviser tousjours,
Et à luy raconter quelles sont mes amours,
L’an me semble plus court qu’une courte journée.
 
Si quelqu‘un parle à moi, j’en ay l’ame gennée,
Ou je ne lui dis mot, ou mes propos sont lours :
Au milieu du devis s’esgarent mes discours,
Et tout ainsi que moy ma langue est estonnee.
 
Mais quand je suis auprès de celle qui me tient
Le coeur dedans les yeux, sans me forcer me vient
Un propos dessus l’autre, et jamais je ne cesse
 
De baiser, de taster, de rire et de parler :
Car pour estre cent ans aupres de ma maistresse,
Cent ans me sont trop courts, et ne m’en puis aller.