Cinque Canzonette veneziane "da battello"

Diseme pur balordo
Diseme pur cocal
che no ghe n'ho per mal,
museto belo.

Se anca me bastonè
o péso vu me fè
a tuto mi ghe fasso de capelo.

Se anca me comandessi
in fogo vivo andar,
mi no staria ...
a presto andaria.

Soportaria de cuor
de le fiamme l'ardor,
perchè vu sè el mio ben,
La vita mia.

Quei oci me fa guera
e me ferisse ognora.
Ma più, cara,
mi inamora,
quel vostro bel visin.
                                           
Insoma me piasé
no so se lo sapiè
che abia tuto in sconquasso
sto gramo coresin.

Quele rane via lassè
Non fissè a quela misura che vu
Beta, fe un gran mal!

Geri sguarda come el fogo,
grassa come un beccafigo,
e vu adesso se un feral.

Resto assae mortificà
perchè v'amo.. che xè un toco,
benchè vu no lo sapiè.

Ve confesso adesso el vero
che a vederve cussì afflita
propriamente me massè.

Se pecà che quel visin
abia dà in malinconia,
non se vogia un fià esalar.

Se aplichè vu d'esser mia,
Mi so vostro...
Comandeme!
Che so tuto qua per vu.

Sento che el cuor me manca
averte da lassar ...
e afato abandonar.
Moro da la passion
che mai sarà de mi.
Privo restar de ti,
tra pene tante.

Adio per sempre, adio.
Ah, vissare del mio cuor.
Adio mio dolce amor.
Adio ma stela.
Chi'l pianto pol frenar,
In caso si crudel...
Si, parte el to fedel
Adio, mia bela.

Infin che'l tempo è belo,
andemo a far bordelo,
andemo a ciassisar, puti galanti.
Non stemo a consumar,
più tempo a smorosar,
che'l fruto de l'amor xe pene e pianti.
Andemo a ciassisar, puti galanti.

Montemo in bateleto,
marciemo col frescheto,
metemose a sonar,femo fracasso.
Non stemo a consumar,
più tempo a smorosar,
che'l fruto de l'amor xe pene e pianti.
Andemo a ciassisar, puti galanti!