De quelle plante, ou de quelle racine,
De quel unguent, ou de quelle liqueur
Oindroy-je bien la playe de mon cœur
Qui d’os en os incurable chemine ?
 
Ny vers charmez, pierre, ny medecine,
Drogue ny jus ne romproient ma langueur,
Tant je sen moindre et moindre ma vigueur
Ja me trainer en la Barque voisine.
 
Las ! toi qui sçais des herbes le pouvoir,
Et qui la playe au cœur m’as fait avoir,
Guary le mal que ta beauté me livre :
 
De tes beaux yeux allége mon souci,
Et par pitié retiens encore ici
Ce pauvre amant qu’Amour soule de vivre.