[Marie]1, baisez-moy ; non, ne me baisez pas,
Mais tirez moy le cœur de vostre douce haleine ;
Non, ne le tirez pas, mais hors de chaque veine
Succez-moy toute l'ame esparse entre vos bras ;

Non, ne la succez pas ; car apres le trespas
Que serois-je sinon une semblance vaine,
Sans corps, desur la rive, où l'amour ne demeine
(Pardonne moy, Pluton) qu'en feintes ses esbas ?

Pendant que nous vivons, entr'aimons nous, Marie,
Amour ne regne point sur la troupe blesmie
Des morts, qui sont sillez d'un long somme de fer.

C'est abus que Pluton ait aimé Proserpine ;
Si doux soing n'entre point en si dure poitrine :
Amour regne en la terre et non point en enfer.