Minnelieder

Mich dunket niht so guotes noch sô lobesam
sô diu liehte rôse und diu minne mînes man.
diu kleinen vogellîne
diu singent in dem walde: dêst menegem herzen liep.
mirn kome mîn holder geliebte, in hân der sümmerwunne niet.

Ich stuont mir nehtint spâte an einer zinnen.
dô hôrte ich einen ritter vil wol singen
in Kürenberges wîse al ûz der menigîn:
er múoz mir diu lánt rûmen ald ich genietè mich sîn.

Ûf der lindenwipfel óbenè da sanc ein kleinez vogellîn.
vor dem walde wart ez lût: dô huop sich aber daz herze mîn
an eine stat dâ ez ê dâ was. ich sach die rôsebluomen stân:
die manent mich der gedanke vil die ich hin zeiner frouwen hân.

Dî minne bidde ich ende mane,
dî mich hevet verwunnen al, 
dat si dî scône dâr tû spane
dat si mêre mîn geval.
want geshît mich alse den swanen
dê singet alser sterven sal,
si verlûset te vele dâr ane.

Wîp unde vederspil diu werdent lîhte zam:
swer si ze rehte lucket, sô suochent si den man.
als warb ein schoene ritter umb eine frouwen guot.
als ich dar an gedenke, sô stêt wol hôhe mîn muot.

Aller wîbe wünne diu gêt noch megetîn.
als ich an sî gesende den lieben boten mîn,
jo wurbe ichz gerne selbe, waere ez ir schade niet.
ich enweiz wiez ir gevalle: mir wart nie wîp álsô liep.

Ach, froúwe, wil du mich genern,
sô sich mich ein vil lützel an.
ich enmác mich langer niht erwern,
den lîp muoz ich verloren hân.
ich bin siech, mîn herze ist wunt.
frouwe, daz hânt mir getân
mîn ougen und dîn roter munt.
Ach, frouwe, mîne swêre sich,
ê ich verliese mînen lîp.
ein wort du sprêche wider mich:
verkêre daz, du sêlic wîp!
Nein! Ja! u.s.w.

Dô ich dich loben hôrte, dô hét ich dich gerne erkant.
durch dîne tugende manige fuor ich ie helnde, únz ich dich vant.
daz ich dich nû gesehen hân, daz enwirret dir niet.
er ist vil wol getiuret, den du wilt, frouwe, haben liep.
du bist der besten eine, des muoz man dir von schulden jehen.
sô wol den dînen ougen!
diu kunnen swen si wellen an vil güetlîchen sehen.

Swenne ich stân aleine in mînem hemede,
und ich an dich gedenke, ritter edele,
so erblüet sich mîn varwe als der rôse in touwe tuot,
und gewinnet daz herze vil manigen trûrigen muot.

Dû bist mîn, ich bin dîn:
des solt dû gewis sîn.
dû bist beslozzen
in mînem herzen:
verlorn ist das slüzzelîn:
dû muost immer drinne sîn.

Ez stuont ein frouwe alleine 
und warte über heide 
und warte ire liebe, 
so gesach si valken fliegen. 
"So wol dir, valke, daz du bist ! 
Du fliugest swar dir liep : 
du erkiusest dir in dem walde 
einem boum der dir gevalle. 
alsô hân auch ich getân : 
ich erkôs mir selber einem man 
den erwelten mîniu ougen. 
daz nîdent schoene frouwen. 
owê wan lânt si mir min liep ? 
Jô 'ngerte ich ir de keiner trûtes niet."

Ich levede êre te ungemake
seven jâr êre ich ît sprâke
weder heren wille einech wort.
dat hevet sî vele wale gehôrt
ende wele doch dat ich clage mêre:
noch is dî minne alse si was wîlen ere.

Under der linden
an der heide
dâ unser zweier bette was
dâ muget ir vinden
schône beide
gebrochen bluomen unde gras
vor dem walde in einem tal!
Tandaradei
schône sanc diu nahtegal.

Ich kam gegangen
zuo der ouwe
dô was mîn friedel komen ê.
Dâ wart ich empfangen
hêre frouwe,
daz ich bin sælic iemer mê!
Kust er mich? Wol tûsentstunt!
tandaradei
seht wie rôt mir ist der munt!

Dô hete er gemachet
alsô rîche
von bluomen eine bettestat;
des wirt noch gelachet
inneclîche
kumt iemen an daz selbe pfat.
Bî den rôsen er wol mac -
tandaradei
merken wâ mirz houbet lac!

Daz er bî mir læge
wesse ez iemen
nu enwelle got so schamte ich mich,
wes er mit mir pflæge
niemer niemen
bevinde daz wan er und ich.
Und ein kleinez vogellîn -
tandaradei
daz mac wol getriuwe sîn!

Sach íeman die frouwen
díe man mac schoúwen
in dem venster stân?
diu víl wolgetâne
diu tuot mich âne
sorgen die ich hân.
si liuhtet sam der sunne tuot
gegen dem liehten morgen.
ê wás si verborgen,
dô múoten mich sorgen:
die wil ich nu lân.
Man sól schrîben kleine
réhte ûf dem steine
der mîn grap bevât,
wie liep si mer wêre
und ich ir unmêre:
swér dan über mich gât,
daz der lese dise nôt
und gewinne künde
der vil grôzen sünde
die si an ir fründe
her begangen hât.
. . . die seite ist enzwei!