Chants sur d'anciennes paroles

Quand vous serez bien vieille, au soir à la chandelle,
Assise aupres du feu, [devidant]1 et filant,
Direz, chantant mes vers, en vous esmerveillant,
Ronsard me celebroit du temps que j'estois belle.

Lors vous n'aurez servante oyant telle nouvelle,
Desja sous le labeur à demy sommeillant,
Qui au bruit de Ronsard ne s'aille resveillant,
Benissant vostre nom de louange immortelle.

Je seray sous la terre, et fantaume sans os :
Par les ombres Myrtheux je prendray mon repos.
Vous serez au fouyer une vieille accroupie,

Regrettant mon amour, et vostre fier desdain.
Vivez, si m'en croyez, n'attendez à demain :
Cueillez dés aujourd'huy les roses de la vie.

Dites-moi où, n'en quel pays,
Est Flora la belle Romaine,
Archipiades, ne Thaïs,
Qui fut sa cousine germaine,
Echo, parlant quant bruit on mène
Dessus rivière ou sur étang,
Qui beauté eut trop plus qu'humaine ?
Mais où sont les neiges d'antan ?

Où est la très sage Héloïs,
Pour qui fut châtré et puis moine
Pierre Esbaillart à Saint-Denis ?
Pour son amour eut cette essoine.
Semblablement, où est la roine
Qui commanda que Buridan
Fût jeté en un sac en Seine ?
Mais où sont les neiges d'antan ?

La roine Blanche comme un lis
Qui chantait à voix de sirène,
Berthe au grand pied, Bietrix, Aliz,
Haramburgis qui tint le Maine,
Et Jeanne, la bonne Lorraine
Qu'Anglais brûlèrent à Rouen ;
Où sont-ils, où, Vierge souvraine ?
Mais où sont les neiges d'antan ?

Prince, n'enquerrez de semaine
Où elles sont, ni de cet an,
Que ce refrain ne vous remaine :
Mais où sont les neiges d'antan ?

Iehan surprit gentil oyseau 
Lequel charmoit par son ramage :
Et pour ce qu'estoit son plumage, 
Onc ne se vit rien de si beau. 
A terre il met soubs son chapeau
Cestuy doulx chantre du bocage, 
Puis s'en va questant maint rameau,
Pour à l'oysel faire vne cage, 
Disant : « O cher petit moineau ! 
Adonc qu'auray parfait l'ouurage,
Iray vers farouche Isabeau, 
Et de toy luy faisant hommage,
Reclameray pour tel cadeau,
Vng doulx bayser amoureux gage :
Et si m'en donne vng, bien & beau,
Deux en prendray, trois, plus je gage !... 
Las ! point n'est faite encor la cage !... »
Mais Dieu ! quel contretemps nouueau ! 
Bise, qui tousiours fait rauage, 
Auoit emporté le chapeau :
Oyfel chantoit dans le feuillage.
Baysers adieu ! Le pastoureau 
Plus n'en espera dauantage.