Cinq poèmes de Charles d'Orleans

En regardant ces belles fleurs
Que le temps nouveau d'amours prie,
Chascune d'elle s'ajolie,
Et farde de plaisans couleurs;
Tant embasmées sont de odeurs
Qu'il n'est cueur qui ne rajeunie.
En regardant ces belles fleurs
Que le temps nouveau d'amours prie.

Les oyseaulx deviennent danseurs
Dessus mainte branche fleurie,
Et font joyeuse chanterie,
De contres, des chans et teneurs.
En regardant ces belles fleurs
Que le temps nouveau d'amours prie.

Laissez-moy penser à mon ayse,
Hélas! donnez m'en le loysir.
Je devise avecques Plaisir,
Combien que ma bouche se taise.

Quand Merencolie mauvaise
Me vient maintes fois assaillir,
Laissez-moy penser à mon ayse,
Hélas! donnez m'en le loysir.

Car afin que mon cueur rapaise,
J'appelle Plaisant-Souvenir,
Qui tantost me vient resjoüir.
Pour ce, pour Dieu! ne vous desplaise,
Laissez-moy penser à mon ayse.

Petit mercier! Petit panier!
Pourtant si je n'ai marchandise
Qui soit du tout à votre guise,
Ne blâmez pour ce mon métier.

Je gagne denier à denier,
C'est loin du trésor de Venise,
Petit mercier! Petit panier!
Pourtant si je n'ai marchandise.

Tandis qu'il est jour ouvrier,
Le temps perds quand à vous devise:
Je vais parfaire mon emprise
Et parmi les rues crier:
Petit mercier! Petit panier!

Je ne vois rien qui ne m'ennuie,
Et ne sais chose qui me plaise,
Au fort, de mon mal me rapaise
Quand nul n'a sur mon fait envie.
D'en tant parler, ce m'est folie,
II vaut trop mieux que je me taise.
Je ne vois rien qui ne m'ennuie,
Et ne sais chose qui me plaise.

Voudrait aucun changer sa vie
A moi, pour essayer mon aise?
Je crois que non, car plus mauvaise
Ne trouverait, Je l'en défie,
Je ne vois rien qui ne m'ennuie.

Nouvelles ont couru en France,
Par maints lieux, que j'étais mort,
Dont avaient peu déplaisance
Aucuns qui me hayent à tort,
Autres en ont eu déconfort,
Qui m'aiment de loyal vouloir
Comme mes bons et vrais amis,
Si fais à toutes gens savoir
Qu'encore est vive la souris!

Je n'ai eu ni mal ni grevance,
Dieu merci, mais suis sain et fort,
Et passe temps en espérance
Que paix, qui trop longuement dort,
S'éveillera, et par accord
A tous fera liesse avoir,
Pour ce, de Dieu soient maudis
Ceux qui sont dolens de voir
Qu'encore est vive la souris!