Lustige Lieder in Aargauer Mundart

Gärtner, chum cho d'Schlößli bschnyde! 
s'mags nid jedes Stündeli lyde,
s'git gar fyni drunder! 

Und wär eis so weich wie Syde: 
Chunt de Rächtcho d'Schlößli bschnyde, 
denn passiert es Wunder.

I bin i d'Beeri gange
dur d'Büsch und Studen i,
ha nüt is Chrättli gfunde,
's isch nonig zitig gsi.

I bi zum Schätzli glaufe,
isch d'Muetter bin em gsi;
es winkt durs Fänster use:
"Chumm spöter! 's isch no z'gli!"

's alt Bäbi, heißt's, seig gwüss e Häx
und wüß gar mängerlei,
se thüi's ein a mit Blick und Spruch
und düre Chrottebei.

Und weiß i's au vor Alte nid,
vo'r Junge weiß i's gwüss:
Se hält mi bannt an Lib und Seel
mit ihre süeße Chüß.

Chumm über's Mätteli,
chumm über e Hag!
Chumm vor mys Fänsterli,
Säg mer Guettag!

Chumm a mys Fänsterli,
chumm a mi Tür!
'sisch für en einzige Bueb
's Riegeli nit vür.

Nummenen einzige Bueb,
dä liess ig y -
Andri wei zue mer cho -
Är goht verby.

Was gilt's denn do? Was g'sehn i do?
D' Chatz het dem Chind der Nüggi gno!
Mis Chröttli macht es Düreli
und luegt em Nüggi no:
"Bis nume still! Do hest e jo!"
Potz Wält es lachet scho!

Mys Büebli isch erwachet,
der Morgen isch im Land!
Im Garte singe d'Vögel
und s'Sunne schynt a d'Wand.

Und s'Müeti stoht bim Bettli
und lachet's fründlig a,
Do seit's: "Gäll hüt isch Sunndig?
Chumm! chumm legg mi weidli a!"

Gugeli, Gygeli Brotisbei! 
Lüpfet's Füessli, lüpfet d'Bei!
s'chunnt e Zyt, s'chunnt e Tag,
wo me se nümme lüpfe mag.

Gygeli, Gygeli Brotisbei!
Gäll, mer göh no lang nit hei!
Gö nit hei bis's Hüendli chreiht,
und der Güggel Eier leit.

Gygeli, Gygeli Brotisbei!
D'Buebe füehre d'Meitli hei.
Wär nit tanzen und singe cha;
dä sell au nit Hochzyt ha!