R.
  Que dis tu, que fais tu, pensive tourterelle,
  Dessus cest arbre sec? 
T.
                          Las, passant je lamente.
R.
  Pourquoy lamentes-tu?
T.
                         Pour ma compagne absente,
  Plus chere que ma vie.
R.
                         En quelle part est-elle?
T.
  Un cruel oiseleur, par glueuse cautelle
  L'a prise et l'a tuée, et nuict et jour je chante
  Son trespas dans ces bois, nommant la mort meschante
  Qu'elle ne m'a tuée avecques ma fidelle.
R.
  Voudrois-tu bien mourir avecques ta compaingne?
T.
  Aussi bien je languis en ce bois tenebreux,
  Où tousjours le regret de sa mort m'accompaingne.
R.
  O gentils oiselets, que vous estes heureux!
  Nature d'elle-mesme à l'amour vous enseigne,
  Qui mourez et vivez fideles amoureux.