Revenge moy, pren la querelle
De moy, Seigneur, par ta merci,
Contre la gent fausse et cruelle.
De l’homme rempli de cautelle,
Et en sa malice endurci
Delivre moy aussi.
Las ! mon Dieu, tu es ma puissance, 
Pourquoy t’enfuis me reboutant ?
Pourquoy permets qu’en desplaisance
Je chemine sous la nuisance
De mon adversaire, qui tant
Me va persecutant ?

A ce coup ta lumiere luise
Et ta foy veritable tien :
Chacune d’elles me conduise
En ton sainct mont, et m’introduise
Jusques au tabernacle tien,
Avec humble maintien.
Là dedans prendray hardiesse
D’aller de Dieu jusqu’à l’autel,
Au Dieu ma joye et liesse :
Et sur la harpe chanteresse
Confesseray qu’il n’est Dieu tel,

Que toy, Dieu immortel.
Mon cœur, pourquoy t’esbahis ores ?
Pourquoy te debas dedans moy ?
Atten le Dieu que tu adores :
Car graces luy rendray encores,
Dont il m’aura mis hors d’esmoy,
Comme mon Dieu et Roy.